Կենտրոնական Բոսնիայի կանաչ բլուրների ու մարգագետինների մեջ տեղացի գործարարն իրականացրել է իր վաղեմի երազանքը՝ վերստեղծելով Վինսենթ վան Գոգի ամենահայտնի կտավներից մեկը՝ «Աստղային գիշերը», հայտնում է Reuters-ը։

Վիսոկոյից Հալիմ Զուկիչը որոշել էր այգի ստեղծել դեռեւս այն ժամանակ, երբ 20 տարի առաջ հարեւան գյուղում հողատարածք եւ քոթեջ էր գնել, բայց հստակ պատկերացում չուներ, թե ինչպիսին պետք է լինի այն։

Վեց տարի առաջ, երբ նա կանգնած էր մի բլրի վրա եւ տրակտորներին էր դիտում, գետնին նկատեց պարուրաձեւ անիվի հետքեր, որոնք նրան հիշեցրին Վան Գոգի՝ 1889 թվականի նկարի պտտվող մոտիվները:

«Այդ պահից ես այլևս կասկած չունեի»,-ասել է Զուկիչը Reuters-ին: Բայց նրա տեսլականը գիտակցելը ժամանակ, գումար եւ ջանք պահանջեց:

Զուկիչը ցանկանում էր, որ 10 հեկտար մակերեսով Աստղային գիշերվա զբոսայգին դառնա ավելի մեծ համալիրի մի մասը, որն այցելուներին առաջարկում է գաղտնիություն: Նա տնկեց ավելի շատ ծառեր եւ ստեղծեց 13 լիճ՝ օգտագործելով գոյություն ունեցող բնական հոսքերը:

Նկարին համապատասխանելու համար վեց տարբեր երանգների նարդոսի 130,000 թփեր տնկվեցին, ինչպես նաեւ այլ բուժիչ եւ անուշաբույր խոտաբույսեր, ինչպիսիք են եղեսպակը, էխինացեան, որդանակը եւ երիցուկը, որոնք ձեւավորում են գունավոր շրջանակներ, պարույրներ եւ բնական ամֆիթատրոններ:

Ինքը՝ Զուկիչը, զբաղվել է տարածքի կանաչապատմամբ։ Նա ասում է, որ նկարի վերստեղծումն օգնել է իրեն հասկանալ նկարիչներին եւ ստեղծագործական մարտահրավերները, որոնց նրանք բախվում են:

Starry Night Park-ը կենտրոնանալու է արվեստի ծրագրերի եւ կենտրոնական Բոսնիայի մշակութային ժառանգության խթանման վրա: