Թուրքիան լրացուցիչ միջոցներ կձեռնարկի, եթե «Նեմեսիս»-ի հուշարձանը չապամոնտաժվի. Չավուշօղլու
- Միջազգային
- 09․05․2023
Թուրքիան կոչ է արել Հայաստանի իշխանություններին ապամոնտաժել «Նեմեսիս»-ի հուշարձանը, հայտարարել է այդ երկրի արտգործնախարար Մևլութ Չավուշօղլուն։ Այս մասին գրում են թուրքական լրատվամիջոցները:
Նրա խոսքով, եթե դա տեղի չունենա, ապա թուրքական կողմն այս հարցում նոր քայլեր կձեռնարկի Հայաստանի նկատմամբ։
«Թուրքիան նախազգուշացրել է Երևանին և լրացուցիչ միջոցներ կձեռնարկի, եթե հուշարձանը չապամոնտաժվի»,- ասել է Թուրքիայի ԱԳՆ ղեկավարը։
Հիշեցնենք, որ օրերս Թուրքիան փակել էր իր օդային տարածքը Հայաստանից երրորդ երկրներ թռիչքների համար։ Չավուշօղլուն որոշումը բացատրել էր Երևանում «Նեմեսիս» գործողության հերոսների հիշատակը հավերժացնող աղբյուր–հուշակոթողի բացմամբ: Նրա կարծիքով՝ դա «սադրանք էր»:
Օրերս Երևանի Օղակաձև զբոսայգու 4-րդ հատվածում տեղի է ունեցել «Նեմեսիս» գործողության հերոսների հիշատակը հավերժացնող աղբյուր–հուշակոթողի բացումը: Հուշարձանի վրա գրված են Հայոց ցեղասպանությունը կազմակերպած և իրականացրած երիտթուրքերի պարագլուխներից, ինչպես նաև 1918թ. Բաքվի հայերի ջարդի կազմակերպիչներից վրեժ լուծած հերոսների անունները:
